.. :: .. وصول لقاء أحمد الشقيري ^_^ .. :: ..

[الجوري]

.. :: .. وصول لقاء أحمد الشقيري ^_^ .. :: ..

السلام عليكم ورحمة الله وبركاته

أول شي أحب أعتذر لكم على التأخير

أكيد الكل كان ينتظر هذا اللقاء وأنا أكثر منكم :D

هذا اللقاء تعتبر أول لقاء أعمله في حياتي ومن حسن حظي أنه كان مع شخصية رائعة

أستطاعت بأسلوبها الراقي وكلامها المنطقي أن تدخل القلب بلا أذن

كان اللقاء ممتع جداً أستمتعت كثير وأنا أسويه معاه كان معايا أثنين من أولاد أختي

فأنا خلصت اللقاء قبل الموعد المحدد جلس مع أولاد أختي وسلم عليهم وسولف معاهم شوية

نصحهم نصايح تهمهم وتفيد الشباب وكان يتكلم معاهم كأنه يعرفهم من زمان

بصراحة شخصية أكثر من رائعة سلس في التعامل من جد أنبسطت مرة أني سويت اللقاء معاه

وعادي مو مشكلة لو عدت التجربة ذي مرة ومرتين وعشرة كمان :D



أنا بتول من شبكة ومنتديات القمة وحابين نعمل معاك لقاء أستاذ أحمد

أهلا وسهلا بيكم تفضلي

في البداية ممكن تعرفنا أستاذ أحمد على بطاقة الشخصية والإجتماعية ؟

الاسم أحمد الشقيري من مواليد عام 1973 متزوج والحمد لله وعندي ولدين يوسف وابراهيم

درست في مدارس المنارات في جدة وأخذت الشهادة الجامعة من أمريكا ( كالفورنيا ) قسم نظم معلومات

والماجستير في قسم إدارة الأعمال



ممكن نعرف نقطة تحول في حياتك؟

نقاط كثيرة ماهي نقطة وحدة



ممكن تذكر لنا بعضها ؟

أول نقطة تحول حصلت لي هي كانت بداية الصلاة عام 94 ومازلت أذكر أول صلاة صليتها كانت صلاة العصر وصليتها في البيت

ومن يومها بديت الصلاة وكنت في هذه الفترة موجود في أمريكا ، وبعدها عام 2000 في شهر مارس لما بديت أترك التدخين والشيشة

ونقطة التحويل الثالثة لما بدينا نعمل برنامج يلا شباب عام 2002 دخلنا في مجال الإعلام



أكيد بسبب التغير إلي حصل لك في حياتك واجهتك عقبات ممكن تذكر لنا ماهي ؟

هي العقبات شي طبيعي تصير للي يحاول يحدث نقطة تحول زي التدخين أنا جلست سنتين أعاني أقلع أسبوع وأرجع

يعني ما تركته فجأة وكنت بعض الأحيان أزعل وأتضايق وأرجع له وبعدين أرجع أتحمس وأتركه يعني كنت

طول هذي السنتين أقلع عنه وأرجع له إلا أن تركته الحمد لله

في البرامج التلفزيونية حصلت كمان عقبات بس أنا ما أسميها عقبات أسميها إشارات إلهية الشخص يقدر

يستشف منها ايش ربنا يبغى ، مثلا زي أحنا سوينا رحلة مع الشيخ ( حمزة يوسف ) في رمضان في أمريكا

جينا رمضان الي بعده عام 2004 حبينا نعمل رحلة ثالثة مع الشيخ ( حمزة ) لكن mbc قالو لنا خلاص

ماراح يكون في رحلة هذي السنة وهذا الشيء عمل فينا إحباط فرجعت بلغت mbc وقلت لهم أقدم لكم

برنامج ( يلا شباب ) وأقدم لكم 4 حلقات تعرض في رمضان كل أسبوع حلقة لأن الرحلة كانت تعرض يومياً

فرجعت mbc ردت علي وقالت :. الجدول مليان ومافي مجال أنك تعمل برنامج ( يلا شباب ) وهذا كان إحباط

بالنسبة لي ففكرت إني أستثمر الموضوع فرجعت لهم وقلت لهم طيب أقدم لكم برنامج مدته 5 دقايق بس

وعاد أنتم خلوه في أي مكان يعني 5 دقايق مو مشكلة نلاقي لها مكان ففكروا ورجعوا لي وقالوا الفكرة حلوة

بس لازم تعرض لنا حلقة تكون زي التجربة نشوف فيها البرنامج فقلت لهم يعني أنتم عارفيني

أنا معاكم من 4 أو 5 سنوات والبرنامج إلي أبغاه كله 5 دقايق وحلقة تجريبية لازم أجيب فيها كميرات ومصورين

وراح يكون فيها دفع فلوس راح أجيبهم من مصر وأدفع لهم تذاكر ففي مصاريف كثيرة راح تحصل

لمجرد عمل حلقة واحدة فوقتها قالوا لي لا لازم تعرض لنا حلقة تجريبية فأنا وقتها كدت أني اصرف نظر عن الفكرة

وكان باقي على رمضان 3 أشهر بس والوقت ضيق ويعدها يمكن بـ 3 أو 4 ساعات في نفس اليوم

نفس اليوم إلي mbc طلبوا مني حلقة للبرنامج كلمني واحد من أصحابي وقال لي أنا جايب فريق تصوير كامل

عشان برنامج نبغى نصور منه حلقة تجريبية ، فقلت سبحان الله فريق التصوير جا لحد عندي

وقلت هذي كانت إشارة من ربنا فكلمت المخرج وقلت له ابغاك يوم الخميس الصباح ساعة

تصور لي حلقة على السريع وبعدين نرسلها لـ mbc فصورنا حلقة تنظيف الحمامات ( الله يكرمكم )

وأرسلناها إلى mbc ولا جاتنا الموافقة منهم إلا في نص اوقست وكان باقي على رمضان شهرين

وبعدين عملنا إعداد للحلقات وصورنا وأخذ مننا الإعداد أسبوع والتصوير أسبوع وعملنا المونتاج في أسبوع

وطلع معانا في النهاية برنامج ( خواطر 1 ) وخواطر كبرنامج طلع وصار بسبب عقبات صارت لنا

ولو هذه العقبات ما استثمرناها ماكان طلع لنا ( برنامج خواطر )



يعني كانت هذي هي البذرة الأولى لبرنامج خواطر ؟

أيوة هذه العقبات كانت البذرة الأولى لبرنامج خواطر



طيب أحمد الشقيري فين يلاقي نفسه أكثر في ( يلا شباب ) أو في ( خواطر ) ؟

لك واحد منهم له جماله يعني يلا شباب كان حواري ودردشة وكان الضغط علي أقل لأننا كنا مجموعة

وأنا كنت واحد من ضمن فريق وكمان الضغط أقل لأن الفيشاوي كان هو المقدم الرئيسي للفريق

وأنا كنت داعم له بس في مجال ثقافي او جاد وكان فيه مجال التسلية أكبر لأنه كان فيه تصوير وبعد التصوير نجلس ونتكلم

وكان فيه مواقف مضحكة كثيرة وكنا نقابل ضيوف كل حلقة ضيف وكان جانب التسلية أكبر في ( يلا شباب )

وفي ( خواطر ) كانت المسئولية أكبر لأن كل العيون على شخص واحد والتحضير له كان أطول

فكان لكل واحد ميزاته وخصوصياته



يعني هل تعتبر ( يلا شباب ) مرحلة وعدت و( خواطر ) مرحلة ثانية ؟

أيوة كل واحدة منهم كانت مرحلة



هل من الممكن أنك تعيد تجربة ( يلا شباب ) ؟

لا بشكلها السابق لا لأن البرنامج في وقته كان مميز وطلعت الآن كثير من البرامج لها نفس فكرته



ماذا أستفدت من تجربة ( يلا شباب ) وتجربة ( خواطر ) ؟

يلا شباب تجربة فريدة ومميزة وكان فيها اتصال بالمفكرين والدعاة يعني هذي أكبر وأعظم نعمة في يلا شباب

لأننا كنا في بعض الأحيان نجلس بالساعات وبعض الأحيان بالأيام مع ناس كان الشخص يحلم أنه يجلس معاهم

زي لما تجلسي شهر رمضان كامل من الشيخ حمزة يوسف تخرج شخص آخر ومختلف تماماً

وكمان الدكتور طارق السويدان والأستاذ عمرو خالد والحبيب الجفري كلهم بصراحة الجلوس معاهم رفعني

رفعة معنوية ونفسية وفكرية ما كنت سألقاها بأي أسلوب آخر

وخواطر أعطاني مسئولية أكبر وحرية أكثر لأن البرنامج أنا أديره بالكامل فأعطاني حرية بالأفكار وطرح للمواضيع بدون تدخلات



هل يا ترى ناوي إن شاء الله تعمل لنا جزء رابع لخواطر في العام القادم ؟

أيوة إن شاء الله راح يكون في ( خواطر 4 ) إذا ربنا شاء



كلمنا عن الأفكار إلي راح تكون موجودة فيه ؟

والله إلى الآن مافي أفكار وراح نبدأ التحضير في يناير والتصوير في أبريل أو مايو فيعني ممكن راح تكون فيه

مواضيع جريئة أكثر والمشاكل الإجتماعية راح تكون فيها جرأة يعني ممكن نتكلم عن الحشيش والمخدرات

والشذوذ وبعض الأمور الجنسية التي يعاني منها المجتمع هذا يمكن يكون التوجه هذي السنة لأنه الجزء 3

كان يتكلم عن موضوع الأمة والقضايا الكبيرة في الأمة وتوحيد الهلال والعصبية فكانت قضايا كبرى

وفي الجزء 4 راح ننزل إن شاء الله لقضايا المجتمع



هل تفكر في طرح برنامج آخر غير خواطر يعرض طول السنة ؟

الخطة حالياً برنامج في السنة وخواطر في رمضان يعني خواطر وخواطر وبينهم برنامج إن شاء الله



حضرتك ذكرت أنك راح تعرض مواضيع جريئة يعني هل ممكن الجرأة هذه تسبب صدمة للمتلقي

بالذات عندنا في مجتمع محافظ ؟

لا لازم المجتمع ينصدم عشان يصحى



لكن ممكن كذا تلاقي رفض ؟

هذا طبيعي حتى خواطر 3 كان في فئة ماهو عاجبها ولا عاجبتها المباديء واعترضوا على بعضها وهذا طبيعي



زي حلقة لما قلت نوحد الهلال ؟

أيوة زيها وزي لما حطيت في التتر سني وشيعي بس لكل واحد فكره ونهاية المطاف الواحد يعمل الشيء إلي

يشوفه صحيح ويعتقد أن المجتمع بحاجة له

والمجتمع ماراح يتطور لو ماكان فيه جرأة وفيه ملامسة للواقع بدون مجاملات وهذا واقعنا ولازم نصلحه

وعشان يتصلح لازم يجي أحد ويعترف بالمشكلة



في ناس تستند للقول ( إذا بليتم فاستتروا ) ؟

أيوة صحيح إذا بليتم فاستتروا على المجال الشخصي عندك مصيبة ما تطلع تجاهر بيها أمام الناس يعني مثلا

أنت مدمن خمر ماتطلع تشرب قدام الناس أنستر في بيتك

بس مو معنى كذا أنك ما تواجه مشاكل المجتمع وتعترف أنها موجودة بدون الشفافية في معالجة المشاكل

راح تتضخم المشكلة وأحنا ماراح نشعر بيها وفجأة راح نلاقي إنفجار وهذي هي المشكلة



أحمد الشقيري أين يجد نفسه بين شباب اليوم ؟

بصراحة ماني عارف لو أعرف بأقول بصراحة يعني موجود كل واحد في مجاله ويحاول يصلح قدر المستطاع

يصلح نفسه أولاً وبعدين يصلح من حوله وكل واحد في جهة



ماهو حلمك إلي أنت تحاول تسعى عشان تحققه ؟

والله أنا حلمي أن الناس تبدأ تقرأ وتفكر وتخرج عن الجمود الفكري الموجود حالياً الواحد يبدأ يفكر ويقرأ ويتثقف

ونفسي أشوف الشباب كل سنة نسب ومعدلات قراءة الشباب في ازدياد ونسب بيع الكتب الفكرية مو كتب الخزعبلات

والشعوذة في ازدياد هذا هو حلمي أن تصبح القراءة كووول



طيب ليش ماتعمل شعار لحملة ( القراءة كول ) ؟

أحنا الآن شغالين على الموضوع هذا أن القراءة تكون كول والشاب يصير يتفاخر أمام البنات بما يقرأ

وليس بما يركب أو بما يلبس وتصير المكتبات تجمع الفتيات والشباب حتى لو للمعاكسات وليس التحلية والمقاهي

وفترة إن شاء الله تنتهي المعاكسات ويعني هذا التوجه إلي يصبح للقراءة لا يقتصر فقط على المتدين ولكن

تكون وسيلة في الحياة لتحقيق هدفك



في الفترة السابقة شاهدنا أعمل عنف وإرهاب حصلت في السعودية وخارجها وطالب كثير من الأهالي بعمل

مناهج دراسية لترسيخ مبادئ ضد الإرهاب والتصدي لهذه الأعمال ما رأيك ؟

أحنا لما نجي نشوف المناهج نلاقي أن فكرها ما هو إرهابي بس لازم المنهج يكون يعلم الطفل من البداية

إحترام الرأي ورأي الآخرين فيعرض عليه جميع الآراء فبالتالي يصبح فكرياً لأن واحدة من جذور الإرهاب

هو فكر قضية فكرية تقصي الأخر لدرجة أنها تريد أن تقتله فهي أساساً إرهاب فكري فلازم المنهج في أمور

الفقه والحديث تتعامل مع الفتاوى الفقهية الرأي والرأي الآخر وكلاهما يحتمل الصواب فيخرج الشاب من مادة الفقه

وهو عارف أن ممكن الجنازة أسلم مرة على اليمين وممكن في مذهب آخر أسلم على الجهتين ماهو مثلا ما درسنا

أن كل الأمور إلي درسناها مسلمات وليس لها رأي آخر فهذا الإرهاب بذرة ونستطيع محاربتها بالوسطية في الدين

والتركيز على شخصية الرسول عليه السلام ليس كما درسنا المعارك والغزوات ولكن نركز على الرسول الإنسان

مثل ما عرضها لنا عمرو خالد ( على خطى الحبيب ) وطارق السويدان ( الرسول الإنسان ) يجب تدريس مادة

يكون أسمها ( الرسول الإنسان ) تحي شخصية الرسول هذي بشكل غير مباشر تبتر الإرهاب

لأنه الطالب يخرج منها وعنده صورة ثانية منافية تماماً للي نشوفها عند الإرهابيون

فراح نقول لا الرسول ما أمرنا بكذا ولا ديننا علمنا كذا



من خلال تجاربك في الحياة ومن وجهة نظرك ماهي الأمور الي لازم تتحلى بيها الفتاة والشاب في هذا الزمن ؟

أهم شي أنهم يحملون هدف في الحياة ويعيشون من أجله يعني لو أردت أني أخذ شيء غيره الرسول

في الناس هو الدين لأنه بدال ماكانوا الناس عايشين على الفاضي وبلا هدف وأستطاع

عليه السلام تغير فكر الناس وأصبح لهم هدف معين يعيش عشانه فلو صار هذا الهدف متوفر للشباب

كثير من القضايا الموجودة راح تحل بإذن الله لأنه لما يصير عندك هدف ماراح يصير فراغ

لأنه لما يصير وقتك وفكرك وجهدك مليان ومافي فراغ عالجت قضايا والمخدارت والتدخين وإهمال الأسرة

والقتل والسرقة لأن هذه كلها منتجات لوجود فراغ والفراغ منتج لعدم وجود أهداف



كيف خطرت في بالك فكرة أندلسية ؟

والله جائتني الفكرة لما حددت هدفي وهو إعادة أمة إقراء للقراءة فبدأت تجيني أفكار كثير لمشاريع كثيرة

مشروع ليش ما أفتح موقع يهتم بالثقافة ومشروع برنامج للقراءة ومن ضمنها ليش ما أجيب القراءة

لمكان يحبونه الشباب والشباب كلهم صايرين يحبون الكوفي شوب وطيب ليش مانفتح لهم كوفي شوب

ونحط فيه أدوات غير مباشرة لترويج القراءة ومنها هنا جات فكرة أندلسية



ليش الآن في هذه الفترة صار لما أحد يقول كوفي شوب على طول يروح فكرنا لشي مو زين ؟

لأن هذا هو الواقع أصبحت أغلب الكوفيهات هي أماكن للشيشة والتدخين والمقابلات لان هذا الواقع

كوفي شوب مثلا يعني شيشة



طيب نقدر أحنا أننا نوجد بديل و نخلي المتعة حسية ؟

أيوة هذا هو المطلوب إننا نوجد بديل بنفس المستوى من ناحية الخدمة وجودة الأكل ونظافة المكان

وبدائل توفر ترفيه للشباب بحيث يعوض عن الترفيه السلبي وهذا المبدأ تغير أساسي لو أردنا أن نغير

أن النفس لا تترك شيء إلا لشيء يعني مستحيل النفس تترك هذا الشيء إلا لو وفرت لها بديل بنفس المستوى

زي الكاسة مثلا مستحيل تكون فاضية نلاقيها مليانة هوا وأحنا ممكن إلي نحط فيها بيبسي أو خمر

ولو جينا نشفط الهوا ما نقدر ولا راح تنكسر الكاسة ولا تكون مليانة بشي ، ومشكلتنا أن أحنا مركزين

على جانب النهي عن المنكر وناسين أن الله قال في الآية قبل إنكار المنكر الأمر بالمعروف فلازم في البداية

نوفر المعروف وبعدين نأمر الناس بيه وبعدين ننكر المنكر إحنا بس إنكار منكر نجي نقول حرام لا تتفرج

حرام لا تاخذ مخدرات ولا تروح المكان الفلاني طيب فين أروح كمان ما أروح مولات ولا كوفيهات طيب

لازم في البداية توفر لي مكان بعدين تعال قولي لي تعال من هنا لهنا وهيئة الأمر بالمعروف والنهي عن المنكر

سيكون لها أثر مئات الأضعاف لو بذلت جهودها وطاقاتها لإنشاء بدائل بدال نهي الناس عن هذه الأماكن



طيب ليش ماحاولت يا أستاذ أحمد لو صار تعاون بينك وبين الهيئة ؟

نأمل إن شاء الله يكون بيننا تعاون مافي أي مانع



ناهيك عن الإختلاف في المذاهب والأفكار مو المهم مصلحة الشباب في النهاية ؟

صحيح أهم شي مصلحة الشباب بس هو الخلاف الأساسي في التطبيق والوصول للمصحلة



ممكن تقدم نصيحة لمتصفحين النت ؟

يحاولون يوجهون الاستخدامات السيئة لشيء أيجابي لو هو مدمن شات يحاول يحول الشات لشيء إيجابي

ويحاول يدخل منتديات فكرية وحوار مع غير مسلمين هذا كله ما يمنعه من الشات بس يحوله لشي ثاني

أحرص يكون عندك فترة محددة لدخول النت لأنه ممكن يتحول إلى إدمان وتضيع وقت

وأنا أفضل أن الشخص ما يدخل النت لمجرد التسلية ولكن يدخل لو هو عارف أيش يبغى بالزبط زي

التلفزيون لا تفتحه عشان بس تقلب القنوات وتتسلى لأنه كذا ممكن تجلس 3 أو 4 ساعات بس تقلب في القنوات

غير لما تفتح التلفزيون عشان أنت عارف أنك تبغى تشوف البرنامج الفلاني أو الفيلم الفلاني

على الأقل لك هدف واضح وراح ينتهي بس لو من غير هدف راح تضيع ساعات وراح يصير إدمان

والآن صار إدمان النت في الصين يحتل المرتبة الرابعة في العالم من أنواع الإدمان

1- المخدارت 2 – الكحول 3 – التدخين 4 – النت

والآن أصبح عندهم مراكز مختصة لعلاج حالات إدمان النت فالحذر من الإدمان



مشكور أستاذ أحمد على اللقاء الممتع

ياهلا بيكم والله يحيكم في أي وقت











وإن شاء الله تكونون جميعا استمتعتم باللقاء

وأحب أشكر قائدنا ومصممنا رومانس على التصاميم

وأقول له مشكوور ماقصرت والله تعبتك معايا

واشكر سترنجات ثلاثة أرباع الأسئلة هي عطتني أياها

الله يعطيكم ألف عافية يارب ولا يحرمنا منكم

ومع مناحي مش حتقدر تغمض عنيك :D



وأحب قبل نهاية الموضوع أذكر الجميع

إلي يقول باقيم ولا يقيم راح افضحه

وبأسوي موضوع أسميه ( فضايح التقيم ) :41:

عشان كذا الي ما يبغى أسمه يكون في هذا الموضوع

لما يقول لك تقيم أو لك أحلى تقيم يقيم من جد ولا لا يكتب من الأساس :D

المصدر: منتديات القمه - كويت اب

---

>> :: ,w,g grhx Hpl] hgardvd ^_^

[الجوري]

في بداية تقسيم المواضيع ماكان في بالنا أبداَ أننا نسوي مقابلة

ولكن رومانس قال لي أننا في موضوع محطات راح نتكلم عن أي شيخ

وبعدين قال لي أيش رايك نتكلم عن أحمد الشقيري قلت له حلو شخصية محبوبة من الكل

وبعدين فكرت أني أروح وأصور أندلسية وعجبت رومانس الفكرة

وفكرت سترنجات أننا نسوي معاه لقاء بس قالت لي أنه مسافر لأن أحد المسئولين

في الموقع الخاص فيه بلغوها أنه مسافر



رحت أندلسية وكان يوم جمعة قلت لواحد من العاملين فيه أني أبغى أصور المكان لكن رفض

وقال لازم تاخذين أذن من مديرة الكوفي وقال لي أنها مو موجودة وأعطاني رقمها تلفونها مسكر كان طول الوقت

اليوم الثاني رحت الصبح رفضت تقابلني قالت أنها مريضة وماراح تقدر تقابلني كتبت لها في ورقة أحنا أيش نبغى

وكتبت لها كمان لو ممكن تخلينا نقابل أستاذ أحمد الشقيري وطلعت

أتصلت عليها في نفس اليوم في الليل وردت علي وأخذت منها أذن أني أصور المكان وقلت لها

أننا نبعى نسوي مقابلة مع استاذ أحمد الشقيري قالت انه الفترة هذي ماهو متواجد مسافر

وأعطتني رقم مديرة مكتبه وأتصلت عليها وقالت لي أنه مسافر

وبعدين رجعت رحت مرة ثانية وكان كمان يوم جمعة عشان أصور أندلسية رفض واحد من العاملين

بلغته أني أخذت أذن من المسئولة هنا لكنه رفض وقال لي أنها ما بلغتهم

ورحت اليوم الثاني في الصباح والحمد لله تم الموضوع على خير ورجعنا بصور أندلسية

في نفس اليوم رجعت أتصلت على مديرة مكتب أحمد الشقيري وقالت لي أنه رجع خلاص

وقالت لي تحبي يكون اللقاء تلفون أو تقابليه شخصياً قلت لها خلاص تلفون وقالت خلاص

أنا أرجع أرد لك خبر ورجعت أتصلت علي اليوم الثاني بس للأسف كان تلفوني ماهو عندي

ومارديت عليها ولما شفت الاتصال رجعت اتصلت عليها وماردت

وطبعا رومانس ماقصر هزأني :D وقال لي أنتي صايرة مهمة لازم تخلي تلفونك معاكي

وبعدين قال لي أن المقابلة تكون شخصياً أفضل من التلفون وقال لي لو ماتقدري تروحي

ممكن الطائر المهاجر يروح أو دواس يجي من الرياض أو أصحابي الي في جدة

قلت له خلاص خليها ترد ويصير خير ان شاء الله

واتصلت علي اليوم الثاني وقالت لي كان موعدك أمس الساعة 2 ونص الظهر

وأنا ما رديت عليكي لانه كان عندنا اجتماعات وبلغتها أني أبغى المقابلة شخصية ووافقت

وفي نفس اليوم المساء اتصلت علي وقالت لي أن المقابلة راح تكون يوم الخميس

من الساعة 1 إلى الساعة 1 ونص الظهر وراح تكون في أندلسية

طبعاً أول ما عرفت بالخبر على طول بلغت أكثر ناس كانوا معايا خطوة بخطوة ويسألوني عن كل شي

والي هم :. ( رومانس – دواس بن علف – سترنجات ) بصراحة على كل شي كان يسألوني

وأنا كنت أقول لهم على كل خطوة قاعدة اسويها الله يعطيهم العافية



وجا يوم الخميس وكنت بأموت من الفرحة عشان رايحة أقابل أحمد الشقيري وأخذت معايا

كل العدة اللازمة :. ( لاب توب – ورق – قلم – كميرا – وكمان )

رحت قبل الموعد بحوالي ربع ساعة أول ماجيت دخلوني في غرفة عملنا فيها المقابلة

طبعاً دخل أستاذ أحمد وأنا خلاص حسيت الدنيا مو سايعتني من الفرحة :41:

عملنا اللقاء ورفض أنه يتصور لأنه ماكان يدري أني أبغى تصوير فماكان عامل حسابه

وقالت لي مديرة مكتبه أنها خلاص راح تصوره وترسل لي الصور وقلت لها أبغى له مقطع فيديو

المهم بعد اللقاء رحت أنا وواحد من أولاد أختي تغدينا برا

ورجعت البيت لقيت رومانس مكسر صندوق الرسايل 3 رسايل منه

كلها يسأل أنا ليش تأخرت وكاتب لي في وحدة من الرسايل شكلي رحت اتغديتي :D

معلييش يارومانس أنا آسفة وهذا اعتذار قدام الجميع :D



المهم بعدها بكم يوم أتصلت عليها قالت لي

أنها لسا ماصورته وقلت لها لو تعملي لي معاه لقاء ثاني أجي أصوره لو مدته 10 دقايق

قالت طيب أشوف أستاذ أحمد وأرد عليكي انتظرت كم يوم ولا ردت رجعت يوم الثلاثاء أتصلت

قالت لي إنها خلاص صورته وأعتذرت لي أنها ما أرسلت الصور وقالت لي بس أستاذ أحمد

مسافر بكرة وأنا قاعدة أرتب له الأوراق الضرورية الي راح يحتاجها في سفره وقالت

يوم الخميس بالكثير إن شاء الله راح تكون الصور موجودة عندك يوم الخميس أنتظرت للعصر

ماجاني ولا شي على الايميل واتصل عليها تلفونها مسكر وامس نفس الشي

اليوم الصبح أول ما صحيت فتحت عيوني وطرت على جهازي فتحت الايميل لقيتها

راسلة لي الصورتين الموجودة في الموضوع وبدون مقطع فيديو



وطبعاً أشكر الي كانوا معايا يشاركوني بكل شي رأي فكرة

عشان تطلع المقابلة في أحسن صورة وهم :. ( رومانس – دواس – سترنجات – بو العز )

من جد الله يعطيكم الف عافية ماقصرتوا معاي مو بس في موضوع اللقاء في كل شي

كانوا يدعموني ويوجهون لي نصائحهم

وأعتذر لكم لو سببت لكم أي إزعاج

الله لا يحرمني منكم ولا يحرمكم من إزعاجي :p



وكان هذا هو السبب في تأخير نزول اللقاء طول الفترة هذي

وصدقوني هذا التعب ماتعبناه إلا عشانكم أنتم يا أعضاء القمة

وإن شاء الله تكونون جميعاً عجبكم اللقاء بكل فقراته

[دانه قطر]

محجووووووووووز

[همسات طفلة]

جوري

الموضوع يستحق الانتظار و لقاء الشقيري يستحق العناء فطوبى لك حلو اللقاء مع استاذ في قيمة الشقيري.

لا شك أنك خضت حربا ضروسا للحصول على المقابلة لكن كل شيء يهون أمام روعة ما قدمته لنا من حوار شيق ممتع.

يعطيك الصحة غاليتي و سلمت أناملك و أنامل من خاض نعك هذه الولادة العسيرة لموضوع حصري مميز.

لكي خمس نجوم و أحلى تقييم لعيونك خوفا من الفضيحة و الوعيد هههههههه

[RoMaNcE KM]

محجوووز